زحلة بوليتيكس – ردت رئيسة الكتلة الشعبية ميريام سكاف على كلام للإعلامية ديما صادق.
وكتب سكاف على حسابها على “إكس”: للتوضيح سيدة ديما:
مريم صديقتي من سنين، ووقفت حدي بمحنتي كأم عم تتعرض لحرب ظالمة، ليه ما فيكن تتقبّلوا تشوفوا الناس اصدقاء بلا مصالح.
واذا بدك تعتبري إنو كل صديق هوي موظّف، ما بيعود فينا نلحّق نعدّ قديه فيه اعلاميين كانوا يتصوروا مع سياسيين ويعملولهن مآدب عارمة وبعدين ينتفضوا عليهن بالثورة.
وطالما بتشتغلي بالصحافة ودقيقة بمعلوماتك عتبي عليكي عدم ملاحظتك اني خارج السلطة ومواقع القرار.
تغريدة ديما صادق
وكانت ديما صادق وبمعرض ردها على انتقاد من مديرة الأخبار في الجديد مريم البسام، كتبت في تغريدة: “ما فيني احترم صحافي بيشغل عند سياسي، متل ما حضرتك بتشتغلي عند ميريم سكاف”.
وجاء في التغريدة الكاملة لصادق:
“والله يا مريم جربت كتير احفظ ماء الوجه معك، احتراما للموسسة اللي بتشتغلي فيها، للزمالة ، لكتير اشيا ، لكن عبثا انو الواحد يقدر يحفظ اي احترام مع شخص متلك.
خلليني بلش قلك يا مريم اني عمري ما احترمتك مهنيا، لعدة اسباب. اولا لاسلوبك الشعبوي المضحك بالكتابة. دخلك انت عندك فكرة كم حدا بيفقع ضحك ع زجلك؟ ثانيا، لا احترمك مهنيا لضحالة ثقافتك اللي ما بتتعدى ثقافة صحافيي زمن الستينيات وخطابهن الخشبي. ثالثا، لان صعب احترم صحافي ما بيحترم حاله. صعب احترم صحافي قبل ع حاله كل الاهانات اللي اهانه اياها جمهور الممانعة من شتايم، من هتك سمعة، و قبلها ع حالو ووطى راسه وسكت. رابعا، ما فيني احترم صحافي عامل حاله شريف مكة بالاعلام وهو ما فتح تمه بحرف عن موضوع رياض سلامة، لا بل كتب مطولات ومقدمات غنائية تتغنى بشرف وبطولات رياض سلامة. لك ما بتستحي ع حالك؟ كاتبة قصايد برياض سلامة وجاية عاملة مطاوعة ع تويتر تعطي شهادة مين صحفي ومين لا؟
خامسا، ما فيني احترم صحافي بيشغل عند سياسي، متل ما حضرتك بتشتغلي عند ميريم سكاف. سادسا، ما فيني اعتبر اصلا صحافي شخص شاف مقطع ع تويتر منشال من سياقه تماما، ما كلف حاله يشوف السياق قبل ما يحكم. هاي صحافي يا مريم اننا ما نعذب حالنا نشوف السياق قبل ما نحكم؟ بتحداكي تشوفي السياق وتضلك عند كلامك. السياق ح انشرو ، بس اخر همي راي وحدة ما خصها بالمهنية في. هيدا اخر كلام عندي، فيكي تردي قد ما بدك، بس انا ما حرد بقا لا عليكي و على الذباب الالكتروني اللي حيجي يدعمك هلق وعاملك زعيمته ومتحدثة رسمية باسمه. اصلا طبيعي الذباب يعملك متحدثة رسمية باسمه”.