كتبت الزميلة دانيال خياط عل صفحتها على “فايسبوك”، تناقش على طريقتها رسائل نواب زحلة ومواقفهم على وسائل التواصل الإجتماعي.
القوات اللبنانية دعونا على “حوار سياسي” السبت مع نائبيهما بزحلة.
النائب سليم عون بيبعتلنا ايمتى عندو إطلالات عتلفزيون.
يسعدهم الشباب على روح النكتة عندهم.
بس ما بيطولوا level نائب حزب الله يلي تصدر لقاء لسرايا المقاومة بالفاعور، خبرهم في انو بؤسنا وشحارنا وتعتيرنا هو جزء من المواجهة الكبرى (انتبهولي ع “الكبرى”) للمشروع الاميركي”
وأضافت خياط: “بوستات الادعية الصباحية للنائب الحشيمي بقراها دائما بعد تغريدات النائب الضاهر. فلكون الاخيرة أبعد ما تكون عن التغريد، بروح عند زميلو إشتري حالي عند ربي.
بلا تشاؤم، مش ناقصنا، خلينا نخفها عليكم مع جولات النائب والوزير بوشكيان لدعم القطاع الصناعي.
لا يزعلوا منا اصحاب السعادة، النا مونة عليكم، لنخبر عن بلد مكربج بارضو وبشعبو”.
وختمت خياط: “فبمرحلة تقطيع الوقت (ابعرفش لنوصل لوين) إنو شو فيها تعمل السلطة (بما فيهم نواب التغيير)! غير إنها تفقي بزر وتبزق قشرو، هلق ساقبت انو الشعب موقعو تحتهم، والا ما توقعلها شي بزرة، مش مفقاية، بلبها”.