كتب النائب أديب عبد المسيح على حسابه على منصة إكس:
“برسم وزراء النقل و السياحة و الداخلية و محمد الحوت. وقفت متل غيري بالصف في مطار بيروت للتفتيش، هيدا المطار يلي بالموازنة كانوا ناسيين يخصصوا نفقات صيانة تليق به، و محمد الحوت بضل يربّح منية انو لولا الميدل ايست ما في صيانة. انتظرت ٢٠ دقيقة، مش هون المشكلة. خلال هذا الوقت مرق ٥ أشخاص خط عسكري، يعني ما انتظروا. إذا حسبنا كل ساعة بيمرق ١٥ شخص بالواسطة، يعني باليوم تقريبا في ٣٦٠ مسافر هودي عاللبناني. اذا حسبنا ٢٥٠ شخص منهم قادرين ماديا يحجزوا صالون الشرف يلي بكلف ٢٠٠ دولار، هيدي خسارة مباشرة لمطار بيروت بقيمة ٥٠ ألف دولار باليوم، يعني مليون و نص دولار بالشهر و ١٨ مليون دولار بالسنة خسارة للهوبرة.
ناهيك عن الأذى المعنوي للأشخاص يلي عم يطبقوا القانون و أضف احتمالية التهريب و التهرب يلي ممكن يصير نتيجة مرور أشخاص مع “حماية”. هلق ممكن يطلعوا بعض الأشاوش ويقولو ليش هيدا البوست و في موسم سياحي. الجواب: احترموا العالم وضبطوا الفساد وعملوا مصاري للدولة في الموسم السياحي. أعتذر عن نشر صورة evidence لأني أحترم البدلة المرقطة”.
